Tambagi ko Noy Kulas: Sigeng tagay

DEAR Noy Kulas, Tawga lang ko sa ngalan nga Clara, taga Cebu City. Ang akong uyab nga magsige og tagay, kada uli hubog. Nag-eskwela siya sa usa ka vocational course. Sukad lang nakabarkada sa tunghaan, sige na sila og laag ug magtagay. Never siya motagay sa una. Sukad lang siya nagtungha, diha na siya nakat-on. Uyab pa lang gani mi, ingon ani na siya. Kusog kaayo mamakak. Magsige og pamakak. Kutob ra sa 3pm ang iyang klase unya pagkahuman busy na kuno siya. Apan ang tinuod tagay ra diay ang iyaha. Magsige siya og text nga busy. Unsaon man ni nako siya? Unsaon nako ning iyang mga barkada? Nisulti siya nga kon moadto ko sa iyang tunghaan, iya kong buwagan. Tambagi ko unsay akong buhaton. Buwagan ko ba kaha ni siya? Naglibog nako kay nagkadugay, nag­kaba­kakon. Kapin na mi sa tuig nga uyab ug karon nigawas ang tinuod. Palihug kog tambag, Noy kulas. Daghang salamat. CLARA Clara, Angay kang magpasalamat nga samtan uyab pa mo migawas na ang tinud-anay niyang kolor. Pastilan dakoa kaha nimo og problema kon nasugamak ka og minyo niya unya diha na nigawas ang iyang pagkahimarkada. Diha na migawas nga palainom siya. Mas dako na nga problema unta kon mao pay nahitabo. Nanghulga pa siyang buwagan ka kon moadto ka sa eskwelahan nila. Dako kaayo nang insulto nimo ka yang sagad ra ba unta, ang babaye man maoy mobuwag sa lalake. Kana kay gibuhat na niya diha nimo, wa siyay respeto nimo. Kay wa siyay respeto, wa nay gugma. Mas iya pang gihigugma ang iyang mga barkada ug tagay. Samtang wa pa na niya buhata, unhi og buwag. Ayaw usiki ang panahon nimo sa tawo nga way pagbati diha imo. Uyab pa gani mo naghatag na siya og labad sa ulo nimo. Unsa na kaha kon maminyo mo ug maadik na siya alcohol ug mga barkada. Kon naglabad ang imong ulo karon, mosamot na kon kanang tawhana maoy madayon nimo. Di ka magmalipayon uban kaniya kay mas malingaw siya sa mga barkada, gawas sa balay. Di siya ganahan magpuyo sa balay. Ayaw kahanugon sa tawo nga way gugma diha nimo. Tinuod usa na mo ka tuig kapin. Apan kon mao na man lang na ang kinaiya, ayaw himoa nga forever ang imong pag-antos. Samtang karon pa, putla ang inyong relasyon. Ayaw huwata nga ikaw ang iyang iluwa og una. NOY KULAS