Tambagi ko, Noy Kulas: Sigeng away

Dear Noy Kulas, TAGOA langko sa ngalan nga “Fil Am,” minyo, 35, naay tulo ka mga anak. Ang akong suliran kabahin sa akong kaugalingon nga panghunahuna. Mag five years na mi nga minyo sa akong asawa. Karon, insecure ko sa akong asawa kay sa una, dalaga pa siya, naa siyay uyab din naay nahitabo nila. Karon, kon magkaaway mi, maglagot man hinuon ko niya unya moabot sa akong hunahuna ba nga maayo pa nga lain na lang nga girl akong gipakaslan total di man sad ako ang nakauna niya. Usahay, grabe siya ka maldita bisan kon gitarong pa pagdala. Buotan man unta ko. Ambot karon magsige na lang mi og away kay dia man ko sa America. Usahay di ko mokontak niya para way samok. Basta motukar akong insecurities sa iyaha about sa iyang past kon grabe among lalis. Usahay makahuna-huna na lang ko og pangita og babaye diri pero maluoy man sab ko sa akong mga anak. Lami lagi kaayo prangkahan nga di mag-ingon ana sobra ka maldita kay angay siya nga magpasalamat kay nagbinuotan ko niya bisan sa iyang past. Karon, Noy, magsige gihapon mi og lalis unya maglagot ko og maayo niya dala ang pagmahay nganong siya ang akong gipakaslan. FIL-AM Fil-am, Ang conflict sa magtiayon o bisan manag-uyab sagad magsugod lang sa gagmay nga mga butang. Bisan sa di pagsinabot sa kolor, estilo sa pagsul-ob, senina ug uban dayon mo-spiral ngadto sa lainlain nang isyu. Ang gamay nga mga butang mahimo nang dako to the point nga ma-threaten na ang relasyon. Mahitabo kini kon ang usag usa dunay mga isyu against sa usag usa nga wa ikasulti ug diha na lang manggawas kon mag-away na. Mao na nga gikan sa gamay nga away nga wa gyuy hinungdan, modako na ang problema og maayo kay natingob sa pagpagawas. Nag-iyahay sa pagpagawas og bomba ang magtiayon o manag-uyab. Sama sa nahitabo nimo karon nga deep inside you, gihilasan diay ka sa imong asawa nga nahilabtan sa laing lalake unya nagminaldita siya. Angay unta nga di mag-iningon ana kay din a siya virgin, but imo gihapon siyang gipakaslan. Di na mao baya. Imo siyang gipakaslan kay nahigugma ka kaniya. Ang issue sa iyang pagkamaldita is separate. Tungod lang ba kay ang babaye di na virgin magpaitoy-itoy na lang diay? Iya siyang asawa ug inahan sa imong mga anak. She deserves your respect bisan unsa ang iyang past. Tan-awa ug huna-hunaa og maayo kon unsa ang ugat sa inyong mga away? Nagduda ba siyang dunay kay lain? Kon dunay laing tawo nga makasulti niya in your behalf, like a family member. Unya, gikinahanglan nga i-patch-up ang unsa man nga inyong giawayan with the intervention sa inyong duha ka mga pamilya. Busa, mas maayo kon dunay makapatunga ninyong duha kay dunay mga marital conflict nga gikinahanglan ang intervention sa family members. Kinahanglan nga mosabot ka nga kon ikaw nag-stress sa trabaho diha, ang pag-atiman sa mga anak stressful usab. Magsinabtanay mong duha. No doubt buotan ka, busa ikaw ang sabot sa imong asawa. Kay kining kaminyuon, no return, no exchange. NOY KULAS