Sugilanon: Ang sekreto sa halo-halo ni Melay
MATAG adlaw magpunsisok sa tindahan ni Melay ang iyang mga suki. Gikahinaman kaayo nilang kan-on ang baligyang halo-halo sa dalaga. Bisan pa man sa kadaghang nanindahay og pabugnaw sulod sa merkado, ang kang Melay nga halo-halo ra man gayud ang ilang nagustoan.
Ang mga sagol nga gigamit ni Melay sa iyang baligyang halo-halo wala ra’y kalainan sa ubang halo-halo nga gipamaligya. Ang presyo niini nahisama ra gikapon sa uban walay kalainan.
Naglibog ang ubang mamaligyaay kon nganong ingon niana kakusog ang baligya ni Melay. Diha pay higayon nga nisantop na lang sa ilang hunahuna nga basin og gibutangan kini sa dalaga og lumay.
“Lumay ka diha!” matod pa sa dalaga dihang iyang nadunggan ang gipasiatab nga tabi sa ubang negusyante.
Sa naangkong asenso karon sa negusyo ni Melay dili gayud niya makalimtan ang iyang kinabuhi kaniadto.
Lisod ang pagpuyo nila kaniadto uban sa iyang ginikanan nga pulos mag-uuma. Ilang gipangunayan pagtikad ang ilang gamayng luna aron maoy ilang kapanginabuhian. Ang kainit sa adlaw manuhot-suhot sa ilang mga panit sa adlaw-adlaw nilang pagbugwal sa yuta aron lang makaani og makakaon.
Bisan og lisod ang ilang kahimtang, malipayon ra gihapon sila sa ilang kinabuhi. Si Melay ug ang iyang manghod nga si Neneng ang mag-uban pagtumod sa mga giani nilang mga lagutmon ug utanon. Gipadako sila sa ilang mga ginikanan nga puno sa pagsinabtanay ug paghigugma.
Usa ka higayon niana, dakong huwaw ang ilang nasinati. Halos walay nahimong ani ang ilang mga tinanom. Nangamatay kini sa subrang kainit. Gibati na usab nila ang kalisod sa ilang panginahanglan sa adlaw-adlaw.
Naghanduraw nga nag-ambo si Melay sa may bintana sa ilang balay nga ginama sa mga lipak nga kawayan. Iyang nahunahunaan ang gamayng kantidad nga iyang gitigom sulod sa iyang alkansiyang kawayan.
“Maaypa og inegusyo ko kining akong tinipigan. Basin pa diay og modaghan,” matod pa niya sa iyang kaugalingon.
Gisugdan dayon ni Melay ang iyang mga plano. Tungod kay ang kainit man sa panahon ang mipatigbabaw, misantop sa iyang hunahuna nga mamaligya og halo-halo.
Gibutang ra niya sa gamayng lamesa ang iyang baligya sa sinugdanan sa pagtuo nga ang ilaha rang mga silinganan ang magka-interes niini sa pagpamalit. Sa ngadto-ngadto wala damha sa dalaga nga bisan ang mga tawo sa kasikbit nga lugar sa ilang dapit nangabot na sa ilang lugar aron mopalit sa iyang halo-halo.
Usa ka sekreto ni Melay sa pagpalambo sa iyang negusyo mao ang iyang pagka maabi-abihon ug paspas nga paghatag sa iyang serbisyo sa mga mamamalit. Ang maanindot kaayo niyang pahiyom nga nakadugang sa iyang kaanyag mao usab ang usa sa mga hinungdan nga
mobalik-balik ang iyang mga suki.
Ug labaw sa tanan gibuligan siya sa Labawng Makagagahom tungod sa iyang sakripisyo ug kakugi dili lamang para sa iyang kaugalingon, kundili alang usab sa uban nga nanginahanglan. (KATAPUSAN)