Tambagi ko Noy Kulas: Childhood boyfriend

DEAR Noy Kulas, Usa ko ka minyo apan dia ko magtrabaho sa abroad aron duna maayong future ang akong pamilya. Nilarga ko human manganak ang akong asawa sa una namong baby. Karon tulo na ang among mga bata. Sa ka modern sa panahon karon, wa ko maglisod og communicate nila. Mag-Skype mi hapit kada gabii aron updated ko sa ilang activities. Kon di gani, anha sa Facebook mi mag-chat. Wa ko kahibawo sa password sa akong asawa sa iyang FB account kay mauwaw ko mangayo. Naa koy nabantayan nga usa ka lalake nga maorag dunay laing pasabot sa iyang mga comment sa pics sa akong partner. Ako siyang gipangutana. Ingon niya silingan ra nila sa una. Nagduda ko kay lihay siya kon maghisgot ko sa mao nga guy. Mao to didto ko sa usa niya ka childhood friend nag-inquire. Didto nako nahibaw-an nga first boyfriend sa akong paris ang lalake. Wa sila magkabuwag kay mi-abroad ang parents ug siya gidala. Usahay lain kaayo og status ang akong misis sa FB. Magbutang siya usahay og complicated sa iyang relationship. Joke ra kuno ni pero ako siyang gibadlong kay abi pa lang way klaro ang among pagpuyo. Wa may nausab sa akong misis but gaduda ko sa iyang childhood boyfriend. Mouliay ra ba ang lalake karong June unya ako next year pa. Unsa may akong buhaton? Galibog ko kay basin masuko ang akong asawa kon ako siyang sultihan sa akong feeling karon. Maldita ra ba. Please tambagi ko. NOEL Noel, Bana baya ka. So, duna kay katungod nga mo-express sa imong na-feel parte anang mao nga lalake. Ayaw na tagoa kay kon taguon na nimo, di na makaayo nimo. Moabot unya ang adlaw nga mati­ngob ang imong na-feel, moulbo ka sa grabeng selos. This early, tell her. Pahibaw-a siya nga nakahibawo na ka nga iya ning childhood boyfriend apan ayaw isulti ang imong source sa information. Kini magsilbe nga warning usab niya nga makahibawo ka bisan wa siya magsulti kanimo sa tinuod. Di siya makapataka o magpasagad sa iyang pagabuhaton. Wa ko mag-ingon nga naa silay relasyon. Basin wa motug-an ang imong asawa sa tinuod aron di ka magselos ug maghuna-huna og dautan. But possible nga naa silay laing communication tali lang nila kay kining childhood relationship magbilin og impression usahay sa usag usa. Naay pipila ka mga relasyon kanhi nga nabuhi tungod sa mga hitabo nga sila mismo wa magpaabot nga mahitabo. Kay naa ka sa gawas, ayaw pagpinareho sa ubang mga bana nga magsige og pangaway sa asawa tungod sa pagsige og duda. Mas maayo pa mag-pray ka sa Ginuo nga ang imong pamilya iyang panalipdan gikan sa mga hulga sa pagkabungkag tungod sa mga tentasyon. Iampo ang imong misis nga di maanod sa bisan unsa man nga tentasyon bisan sa inyong kalagyo. At this time, pagsugod na mo og tigom aron di na ka mahilayo nila. Ayaw huwata nga maniguwang ka na lang sa pagtrabaho sa abroad or sa kadugayan, mabungkag ang imong pamilya. NOY KULAS