2-anyos natuwad, nalumos sa balde
NALUMOS ang 2 anyos nga batang babaye nga misawom sa baldeng pundohanan og tubig samtang nahinanok sa pagkatulog tungod sa kakapoy ang nagbantay sa balay niadtong Huwebes sa alas 4 sa hapon sa Barangay Basdiyot, Moalboal.
Si Trisibbel Monor namatay bisan kon nadali sa mga kabanay sa pagdala sa health center ingon man sa tambalanan sa Moalboal.
Si PO2 Benedicto Rubia ug PO1 Niel Manongsong, mga sakop sa alert team sa Moalboal Police nga nahinabi sa Sun.Star Superbalita, nagkanayon nga maayong pagkatuwad sa bata sa balde sulod sa pansayan.
Sumala sa mga pulis nga ang inahan sa bata gikatahong dunay sakit nga patol hinungdan nga verbal nga gipa-adopt sa ilang silingan nga si Ruffa Fuentes, kinsa naminyo og langyaw, ang bata.
Si Ruffa dunay gilakaw niadtong Huwebes hinungdan nga iyang gibilin ang bata sa iyang pag-umangkon nga si Sally Fuentes, 22, kinsa nagbantay sa ilang balay.
Apan si Sally, kinsa nagtrabaho sa usa sa mga imnanan sa Moalboal, lapoy ang lawas nakatulog ug nataligam-an ang bata.
Nadiskubrihan ang nahitabo sa bata dihang niabot ang usa ka lalaking pag-umangkon ni Ruffa aron unta mogamit sa pansayan.
Nakugang kini dihang nakit-an nga nagtuwad ang bata sa punduhanag tubig nga dunay sulod nga duha ngadto sa tulo ka pulgadas nga gilawmon sa tubig.
Gdali nila og dala ang bata sa tambalanan apan bisan pa kon nagginhawa kini, namatay.
“Nakasulod ang bata sa pansayan kay wala ma-lock. Unya sakto ra man siyang makaduko sa punduhanag tubig, mao tong natuwad. Posibling magduwa-duwa sa tubig,” dugang ni Rubia.
Wa mabantayi ni Sally kay lapoy iyang lawas.
“Nagtrabaho man gud ni siya sa bar apan walay foul play aksidente gyud ang hitabo,” pasabot niya.
Gisugyot gihapon nila sa pamilya nga ipa-ubos sa autopsy ang lawas sa bata. Ang mga silingan ug kabanay niingon nga nakit-an pa nila ang bata nga nagduwa-duwa, nisulod ug gawas sa balay.