Naigo sa mata bala milapos sa liog

CEBU, Philippines - Patay diha-diha ang usa ka ulitawo human kini pusila didto sa Sitio Daghul, barangay San Antonio Danao City sa miaging hapon. Ang biktima mao si Stephen Tampus, ulitawo nga nagpuyo sa nahisgutang lugar, samtang ang suspetsado nailhan usab nga si Gary Latonio, hingkod, ug walay klarong address. Ang biktima naigo sa tuong mata ug ang bala milapos sa iyang tuong liog ug sa iyang buko-buko nga miresulta sa diha-diha niyang kamatayon. Ang suspetsado kinsa miikyas dayon human mahagba sa yuta ang biktima padayon pang gipangita sa kapolisan. Samtang usa ka Koreano nasikop uban sa laing duha ka molupyo sa Consolacion nga nasakpan sa kapolisan sa akto nga nagsuyop og shabu didto sa barangay Sacsac sa maong lungsod kagahapon sa gabii. Ang maong Koreano nailhan nga si Sung Chai Jung, 59, nga taga South Korea apan kasamtangang nagpuyo sa Consolacion; William Lanorias Ramos, 43, taga Purok 1, barangay Nangka ug Reuyan Borres, 28, taga barangay Pulog, tanan sa Consolacion. Nasikop sa kapolisan ang mga suspetsado human madawat ang tip gikan sa usa ka molupyo sa maong lugar samtang namahuway ang mga polis sa Cabanghan barangay hall. Human masayri sa kapolisan nga may grupo sa mga drug addict nga nagsuyop og shabu sa usa ka balay nga walay tawo, diha-diha giukoy dayon sa mga otoridad ug gumikan kay nakabantay, mikabad kini og panagan apan nasikop ra gihapon ug giposasan una ibalhug sa prisohan. Nasakmit gikan sa mga suspetsado mao ang usa ka paketing shabu , 3 ka tinfoil ug 2 ka lighter. Tukmang kaso gipasaka na batok sa mga suspek.