Daghan og bisyo

Dear Tita Salie,
Maayong adlaw. Ako si James, kanunay gyud ko tigbasa og Banat News labi na ang pasabta column. Nagsige ko og basa sa pasabta kay tingali kun akong makit-an ang solusyon sa akong problema. Apan wala pa gyud matubag ang akong mga kalibog mahitungod niining akong asawa.
Duha na ka buok ang among anak, lalaki ug babaye. Apan sakit kaayong hunahunaon nga ako gihapon ang nag-alaga sa akong mga anak tungod kay ang akong asawa labihan ka sugarol. Daghan kaayo og bisyo ang akong asawa ug dili gyud magpapugong. Akong nasayran nga mogamit pa gyud siya og drugas, ug kaadlawon na nga mopauli sa among balay. Usahay buntag na gyud nga mosaka sa among panimalay.
Tungod sa akong kalagot, Tita ako siyang gibulagan. Wala nay pulos ang among pagpuyo tungod kay magsige na lang mi og away. Kun ako siyang pangutan-on kun diin siya gikan nganong dugay siya nakauli moingon ra man gikan kuno siya naningil. Puyde ba diay maabtan og kaadlawon kun maningil lang?
Naglibog gyud ko kaniya, Tita. Wala kaha siya’y lalaki nga gikabuangan? Unsa may angay nakong buhaton? Palihog pasabta ko. Daghan salamat sa imong pagtagad and more power.
* * *
Hi James!
Kun ingon niana ang taras sa imong asawa moingon ko nga tanan segurong bisyo anaa kaniya. Ug dili na kadudahan nga bisan ang panglalaki iyang giapilan. Tungod kay kun magbisyo ka mangita man gyud ka og paagi nga makakuwarta aron imong ikasuporta sa imong bisyo. Hinungdan ang bisyoso nga tawo mamahimong kawatan, snatser, mangingilad, tulisan ug uban pang matang sa buhat ilang sudlan aron duna silay kuwarta alang sa ilang bisyo.
Kun duna ka pay plano nga i-save ang inyong relasyon puyde usab nimong sulayan kanunay siyang ikuyog sa imong mga lakaw, puyde usab nga imo siyang hatagan og gimbuhaton o obligasyon nga dapat niyang himuon sa tibuok adlaw. Ikaw mismo ang mo-rehabilitate kaniya. Tingali kun gilaayan lang siya kay permi lang anaa sa balay mao nga nangita siya og lingawlingaw hangtod nga naganahan na siya niini.
Puyde usab nga imo siyang dad-on, magbakasyon mo didto sa inyong probinsiya kun diin duna kay mga ig-agaw aron iyang mabiyaan ang iyang bisyo ug barkada ug puyde na kanang magsugod og bag-ong istelo sa kinabuhi.
Apan ang tanan anaa ra gyud kanimo, James. Kun dili na gyud nimo kayang lugwayan ang imong pasensiya, padayon sa imong pagbiya kaniya ug palihog ayaw pasagdi ang inyong mga anak. Kun puyde kuyog sila kanimo kay mas secured ang ilang pagdako, kay mas kasaligan ka.
--
Tita Salie