Sugilanon: Upat ka Kaagi ni Human
HUMAN gitawag ug labing maayong higala sa tawo. Buhi ni Milkedesik.
Sa batan-on pa dili kapugngan si Human ang komon dula-dula, pangsinati taliwala sa iyang grupo, sa pakigsuod sa mga ingon kaniya sa gawas sa balay. Molumpayat siya, mangaskas sa pultahan, magpahubad sa higot. Hinuon sa hapon mopauli sa balay ug mopuk-ong tungod sa higot, nga isab-it pagbalik ni Milkedesik.
Paglabay sa pila ka tuig buot na lang magpabilin sa balay, hiktan o dili, sa serbisyo espisyal. Dili mobulag sa agalon. Kon kini magsulat sa talad magbantay siya sa lapis o krayola nga mahulog sa sawog. Kini iyang tangagon ug itunol sa agalon. Kon magsindol-sindol sa tsinelas, siya andam pagpaduol niini sa mga tiil. Kon maniyanggi ang agalon, siya ang magtangag sa bukag. Mobugaw usab siya sa
mosamok sa agalon. Makapanimaho sa tawo nga ngil-ad og tuyo.
Ug unya gusto na lang kini nga maglubog sa suok sa balay hingpit suluguon. Magmingaw ug mag-inusara. Igmat magbantay sa balay ug agalon. Matag lihok sa agalon iyang sabton ug kon nagkinahanglan sa iyang abag nga iyang mahimo anha pa molihok. Dili pabadbad sa higot sa paghandom sa agalon, sa pulong pa, kon molakaw si Milkedesik sa halayo.
Kanunay siya nga maghanduraw sa agalon ug way lain, anaa man kini sa iyang atubangan o sa hulagway niini sa kwadro, sa kahayag o sa kadulom.
Sa dihang nagdugay ang agalon sa isla hayahay nga way kalisod ginganlan og Paradiso, miapas si Human didto. Dili na iro, apan binuhat nga duhay tiil, kauban-uban sa agalon. Dili masulti ang kalipay.
(Kining ubos natong sugid natagik subay sa sumbanan ni Dionysius Areopagite, ang bantugan nga mistikong magsusulat sa basahong The Cloud of Unknowing sa A.D. 500, nga may pasidaan nga dili ipabasa ni bisan kinsa lang.)