Snatcher giluba patay

CEBU, Philippines - Namatay ang usa ka snatcher human kini dunggaba sa dalan Juan Luna , sa barangay Sto. Niño, dakbayan sa Sugbo sa miaging gabii. Ang biktima nailhan nga si Cenon Gallardo, 23, taga sitio San Roque, barangay Ermita, usa ka inila kaayong snatcher, sumala sa kapolisan. Gidunggab nga nagtalikod diin ang kutsilyo milapos sa iyang dughan nga maoy hinungdan sa hinanali niining kamatayon. Matud pa ni Chief Insp. Wildemar Tui, hepe sa Waterfront Police Station nga ilang nasikop ang biktima human kini manglabni og butang sa may pier area. Apan nianang pagkahapon ila kini nga gibuhi-an kay nagdumili man sa pagpasaka og kaso ang nabiktima ni Gallardo. Nagpaingon na pauli sa ilang balay ang biktima dihang gisundan sa wala hiilhing tawo ug sa walay igong hinungdan gihansakan ang likod niini og kutsilyo nga milapos sa iyang dughan. Sa pagkakaron gisuta sa kapolisan ang usa ka ginganlan og Oman nga maoy usa sa gidudahang nanunggab sa biktima.