‘Selosong’ polis gipapriso

CEBU, Philippines - Nagtingkagol sa karsel ang usa ka police nga nadestino sa Complaints and Referral Monitoring Systems (CRMC) tungod sa giingong pagmaoy niini ug gipasanginlang nanion sa usa ka lalaki ug nanapat sa iyang kanhi hinigugma diha sa dalan Visitacion sa barangay Sambag 2 ning dakbayan. Ang nasikop mao si SPO1 Eduardo Seno, 39, taga Poblacion sa lungsod sa Oslob ug kasamtangang nadestino sa CRMC. Ang mga reklamante mao silang Arnel Mack, 39, ug Genelyn Labaja, 36, molupyo sa nahisgutang dapit. Matud pa sa biktimang si Mack,kinsa usa ka negosyante ug nanag-iya og usa ka internet café, kalit lang mibutho si Seno sa iyang dapit ug gibukbok og kusog ilang balay dayong mando kaniya nga pagawson. Sumala pa nga dihang migawas si Mack aron mosusi gitionan siya sa suspek og armas ug gimandoang ipagawas si Labaja. “Paggawas nako, suko kay siya, tion-tion sa armas. Ana siya pagawsa-pagawsa,” matud pa ni Mack. Dako ang pagduda ni Mack nga nagselos kaniya si Seno tungod sa ilang kasuod nga higala sa kanhi uyab niining si Labaja. “Ambot ana niya, nagselos siguro na siya nako, ulitawo man ko, amiga ra intawon mi ana niyang bayhana uy, naa intawon ko’y uyab, mismo kanang babayi makakita na sa akong uyab,” pasabot pa ni Mack. Human si Seno giingong nani-on kang Mack gikatahong si Labaja na usab ang gi-adto ug gisundan padung didto sa Fuente nga nagpalit og tambal ug dihang naapasan gikatahong gibunlot sa maong polis ang babaye ug pugsanong giguyod. Nagpakitabang pa ang dalaga sa usa ka gwardiya apan wala kini nahimo kay gihudlat man ni Seno sa pag-ingon nga usa siya ka polis. “Namalit ko’g tambal, gisundan ko niya ug giguyod. Gihuboan ko sa akong duster, nagisi gud. Karun pa ko kasuway nga huboan ka sa daghan tawo. Kaduha naman ko maminyo, pero siya ra gyud ang nakahimo ani nga nabuak akong nawong, gikaladkad ko sa dalan mura ko’g gi-rape sa gawas. Hapit naman lang gani ko niya itagak sa skywalk,” pasabot pa ni Labaja. Ang duha nagkauyab niadtong 2011 apan gibuwagan kini ni Labaja tungod sa giingong pagkulata kaniya sa maong polis nga nakabuak sa iyang nawong dihang gituhod siya niini, matud pa niya ang pakigkita niya kang Seno ning mga panahona, tungod kini kay ang maong polis man maoy mopalit sa iyang tambal tungod sa pagkabuak sa iyang nawong. Apan si Seno sa iyang bahin, mihimakak sa mga pasangil batok kaniya, gani mipadayag kini nga iyang gihatag ang tanan alang kang Labaja. Matud pa ni Seno nga imposibli kaayo nga manion siya og armas tungod kay ang iyang armas iya ra man kini nga gibutang sa iyang bag. Si PO2 Gerlito Estremos sa Police Station 2 mibutyag nga kasamtangan una nilang gi-detain si Seno samtang nagpahigayon pa sila og lawom nga imbestigasyon tungod sa reklamo sa duha ka biktima. Dugang pa ni Estremos posibleng makasuhan og kalapasan sa City Ordinance (drunkenness), Comelec Gun ban ug physical injuries.