Lola giunay’g tulis sa 3 ka apo, patay
GIUNAY og tulis-patay ang 82-anyos sa iyang tulo ka mga apo sulod sa iyang balay niadtong Sabado sa alas 8:30 sa gabii sa bukirang dapit sa Sitio Buli, Barangay Cansomoroy, lungsod sa Balamban.
Si Luisa Lapuerta, 82, biyuda, namatay human wala makaagwata sa samad dinunggaban og kutsilyo ang iyang walang dughan.
Gitumbok nga mga suspek ang iyang tulo ka apo nga sila si Lucio Enlatera, 22, ulitawo, taga Dumanjug; Renan Cabaltera, 21, taga Basak, dakbayan sa LapuLapu; ug Emelio Dinopol, 20, ulitawo ug taga Barangay Cansomoroy.
Ang tulo nadakpan niadtong Dominggo sa alas 11:00 sa buntag sa Barangay Gaas, Balamban human gitaho sa mga barangay opisyal dihang nasigpatan nga nag-estambay daplin sa karsada nga pulos nagtabon sa ilang mga nawong nga daghang mga garas-garas sa lawas.
Si PO1 Alfredo de Gracia, desk officer sa Balamban police, nagkanayon nga ang biktima nag-inusara sa likod nga lawak sa panimalay sa iyang apo nga si Renard Tabor.
Apan si Tabor nakurat dihang nabati niini ang kusog nga singit sa iyang apuhan nga nangayog panabang kay gisulod siya og gidungab hinungdan nga nagdali siya sa pagsusi.
Sa pag-abot niini maoy iyang nakit-an ang ilang kaliwat nga si “Emelio”, kinsa nagdalig lakaw nga nisum-ok sa kalibunan hinungdan nga nabiyaan ang usa ka pares sa sinelas niini.
Sa pagsusi niya sa lawak ang iyang apuhan, nagbuy-od na nga naglunang sa kaugalingong dugo.
Gipahibalo nila ang ilang kabanay ug gipahibalo usab dayon ang kapulisan bahin sa hitabo hinungdan nga positibo ang pagpa-follow-up niadtong Dominggo.
Ang kabanay nibutyag nga ang tulo ka mga apo nag-inom pa diha sa ilang lugar sa wala pa mahitabo ang krimen og kalit silang nangahanaw.
Si SPO3 Arvie Banate, imbestigador sa Balamban police, nagkanayon nga human gisikop ang tulo niangkon gilayon sa krimen.
Niasoy nila tuyo ang pagpangayo kuwarta sa ilang apuhan aron ipalit nilag armas nga magamit batok sa giingong tawong nagdaugdaog kanila.
“Ang ilang alegasyon nga mangayog kwarta sa apuhan kay ipalit nilag paltik nga armas kay gidaugdaog daw sila diha mga adis-adis man gud ning mga bataa,” dugang ni Banate.
Tungod niini, kasong murder ang ilang ipasakang kaso batok sa tulo ka mga apo kay wala ma-esablisar ang tulis kay walay kwarta o pila ang kwarta nga nahanaw.
Wala makahatag og insaktong detalye ang mga nahibilin kabanay kun pila ang kuwartang gitipigan sa biktima gawas lang sa pagbutyag nga nahalinag yuta pero taudtaud na usab.
Si Chief Insp. Richard Oliver, hepe sa Balamban Police, nahinabi sa Sun.Star Superbalita, nagkanayon nga si “Lucio” niangkong siyay nagdunggab sa iyang apuhan, si Renan diha sa sulod ug sa gawas sa balay si Emilio.