Kapildehan sa pinanser

Nakugang si Riel sa nadawat niyang text message: “Ted died on his bed due to cardiac arrest last night.” Daw dili makatuo ang batan-ong pinanser sa nahitabo. Kagahapon sa buntag gud, nakautang pa niya si Ted og P1.5M. Wala mahimutang si Riel samtang nagpadayo’g tutok sa screen sa iyang selpon. Dili kay P1.5M lang ang utang ni Ted kaniya. Kun itipon ang daan, moabot kinig P8M. Ug kun tinuod man ugaling nga patay na kini, kinsa ... kinsa man ang iyang paninglan? Wala ra ba sila’y papeles nga gipirmahan. Laway ra! Ikaduha, wa gyod masayod ang asawa ug mga anak sa pagkagumon ni Ted sa sugal. Nanginit ang nawong ni Riel. Mikusog pagkuba iyang dughan. Apan wala siya mawad-i’g paglaom. Basi’g binuang ra ang maong balita nga iyang nadawat. Kinahanglan iya usa kining kompirmahon. Kinahanglan masayran niya kun tinuod ba gyod kini. May gitawagan siya, si Aner, ang sinaligan niyang runner didto sa balay-sugalan. Wala abti’g duha ka kiring: “Yes, Boss, good afternoon. Unsay ikaalagad ko kanimo?” “Kuan man god, Aner, gusto lang ko imong susihon kun patay na ba gyod si Ted didto sa ilang balay.” Deretsong sugo sa agalon. “Oo, tinuod na, Sir. Gani, nia ko mismo sulod sa lawak sa Golden Funeral Homes, miduaw sa iyang haya.” Pintok nga tubag sa runner. “Mao ba?” Naisa ang tingog ni Riel. Kalit lang nanghuyhoy iyang mga abaga. Unsaon, gamay na lang ang nahibiling pundo sa iyang negosyo. Kay ang kinadak-ang pahat, iya mang gipautang ni Ted. Good customer man god si Ted. Maayong mobayad. Manghatag pa gyod og tip kun makadaog. Sure win ang tubo sa iyang kuwarta. Busa, way angay kahadlokan bisa’g pila pa ka milyon ang ipahulam. Apan naunsa ba, nga kalit man lang kining namatay? Unsaon na man lang pagbayad sa dakong utang? Dinhi pa makaamgo si Riel nga ang tawo mamatay nga dili lang mahibaw-an kanus-a. Ang kinabuhi sa tawo ug sa iyang negosyo nahisama sa panagway sa sugal. Usahay, modaog. Usahay mapilde. Ug karon, ning nahitabo sa bigtayim niyang kustomer ... nahiagom siya sa masakit nga kapildehan. Gibuhos ni Riel taman sa ginhawa ang iyang kadismaya pinaagi sa pagsiyagit: “Patayyy!!!”